جمعه، مرداد ۳۰، ۱۳۸۸

اوروجلوق

12 آیین سولطانی، اروجلوق آیینیز قوتلو اولسون. بو موبارک آیین تورک-ایسلام دونیاسینا خئییرلره وسیله اولماسینی دیله‌ییره‌م.

جمعه، مرداد ۲۳، ۱۳۸۸

وئبلاگ تانیتیمی: دده قورقود کیتابخاناسی

وئبلاگ تانیتیمی: دده قورقود کیتابخاناسی

وئبلاگین آدی: دده قورقود کیتابخاناسی
آچیقلاماسی: تورک دیللی کیتابلار و یازیلار
آدرئسی: http://dqk.blogfa.com
یاشی: بیر ایله یاخین
ایندییه کیمی یازی ساییسی: 19 یازی

وئبلاگین باشلانیش یازیسی و وئبلاگ حاققیندا بؤلوملرینده «دده قورقود کیتابخاناسینین تورکجه کیتابلاری ای-بوک شکلینده وطنداشلار و دیلداشلاریمیزا تقدیم ائتدیگی» و «بو کیتابخانادا ادبی، تاریخی، مذهبی و باشقا موضوعلاردا اولان کیتابلارین اوخونا بیله‌جه‌گی» قئید ائدیلیر. آیریجا باشلانیشدا «اوخوجولاردان کیتابلاری وورد فورمتینده بو وئبلاگا گؤندرمه‌لری» ریجا ائدیلیر.

کیتابلاردان بعضیسی:
فلسفی فیکیرده اینسان و طبیعت پروبلمی - عادل کاظم اوغلو حسینوو
توءرک یازی قوراللاری- دوکتور جواد هیئت
آذری دیلی؛ غضنفر کاظموو
دده قورقود - دلی دومرول
دل آرا – جعفر جبّارلی
بالاجا شاهزاده- آنتوان دوسنت اقزوپری
شامع و پروانه – عزیزه جعفرزاده
ساری گلین - ائلچین افندیئو
سئوگی- سئودا فرضعلیئوا
جونون پیرایه سی
مئی ساتانلار کوچه سی
من بو جهانه سیغمازام

بو گؤزل وئبلاگین صاحیبینه ال-قولون وار اولسون دئیییب، گله‌جکده داها فعال اولماسینی دیله‌ییرم.

کونسئرت کونسئرت اوستونه

یای فصلیدیر؛ اوروجلوغا دا بیر شئی قالماییب. بو ایکی ندنه گؤره کونسئرتلرین هامیسی گئچمیش ایکی هفته‌یه و اؤزللیکله 21، 22 و 23 گونلرینه توش گلیب. بو موددتده منیم بیلدیگیم کونسئرتلر بونلاردیر؛ باشقاسینی بیلیرسه‌نیز خبر وئرین:

11 مرداد 1388، «مؤو ایله قویونون دئییشمه‌سی»، آشیق حسین علی‌حسینی، آشیق نصرت‌الله زرگر، تئهران اؤیرنجی پارکی (+)

13-16 مرداد ماه 1388، چؤگور موسیقی قوروپو، ساوه ایرشاد ایداره‌سی (+)

22-23 مرداد 1388، عئلمه‌ددین کونسئرتی، تبریز تیراختور سالونو (+)

22-23 مرداد 1388، آراز موسیقی قوروپو(رحیم شهریاری)، تئهران بهمن کولتور ائوی (+ و +)

21-23 مرداد 1388، آشیق حسن اسکندری، همدان گنجنامه (+)

21-23 مرداد 1388، قاشقایی «حاوا» قوروپو، همدان گنجنامه (+)

21-23 مرداد 1388، «تورکمان» موسیقی قوروپو(نوید مثمر)، «دور قاچاق نبی»، تبریز پوتروشیمی سالونو (+)

چهارشنبه، مرداد ۲۱، ۱۳۸۸

کنسرت آذربایجانی گروه آراز

کنسرت آذربایجانی گروه آراز - ایران کنسرت
مکان فرهنگسراي بهمن
تاریخ 22 و 23 مرداد 88
ساعت 20
قیمت 100000 و 200000 و 250000 ریال
به سرپرستی و خوانندگی رحیم شهریاری

تماس با شماره های 22728007 و 22738007 و یا SMS 20001007 مرکز موسیقی ققنوس

کنسرت آراز در فرهنگسرای بهمن - خبرگزاری مهر

کنسرت آراز در فرهنگسرای بهمن - خبرگزاری مهر

گروه موسیقی آراز به سرپرستی رحیم شهریاری 22 و 23 مرداد در فرهنگسرای بهمن به اجرای برنامه خواهد پرداخت.

سرپرست گروه موسیقی آراز با اعلام این خبر به خبرنگار مهر گفت : این برنامه که در تالار شهید آوینی این فرهنگسرا اجرا می شود به قطعاتی از جدیدترین آثار گروه آراز اختصاص دارد.

رحیم شهریاری در ادامه افزود: ما در این کنسرت قصد داریم قطعات فولکلور موسیقی آذری و همچنین بخش هایی از آلبوم های "کیم بیلر(که می داند)" که به زودی منتشر خواهد شد و "گوزللرین گوزلی(زیباترین)" را روی صحنه ببریم.

وی با اشاره به ترکیب گروه آراز تصریح کرد: در این برنامه شهلا میلانی(همخوان)، محمدحسین افشار(نقاره)، پیمان حمیدی(پیانو و کیبورد)، حبیب طاهریان(قوشا)، حمزه شهریاری(کلارینت) و خود من(نوازنده گارمون و خواننده) گروه را همراهی می کنیم.

شهریاری همچنین گفت: ما چند روز پس از این کنسرت راهی کانادا خواهیم شد تا تور کنسرت هایمان را در این کشور ادامه دهیم. پس از کانادا نیز چند برنامه دیگر را در کشور امریکا برگزار خواهیم کرد که تکرار همین کنسرت فرهنگسرای بهمن است.

ائلشن دؤنوب، یئنی وئبلاگینین آدی «ایمله‌شه‌ک»

ائلشن دؤنوب، یئنی وئبلاگینین آدی «ایمله‌شه‌ک». من اونونلا ایمله‌شه‌جه‌گم. قلمی گوجلو، اولسون.

ائلشن جان! سن هر نه یازسان من به‌یه‌نه‌رم. یئتر کی سیلمه‌یه‌سن. قوی بو «ایمله‌شمه» داواملی اولسون. یازیلارینی گؤزله‌ییرم...

سه‌شنبه، مرداد ۲۰، ۱۳۸۸

«تورکمان» موسیقی قوروپو تبریزده کونسئرت وئره‌جه‌ک؛ «دور قاچاق نبی»

نوید مثمر
«تورکمان» موسیقی قوروپو تبریزده کونسئرت وئره‌جه‌ک؛ باشلیق: «دور قاچاق نبی»دیر.

کونسئرت و قوروپون یؤنه‌تیجیسی ده‌یه‌رلی صنعتچی «نوید مثمر» جنابلاریدیر.

تورکمان قوروپو بوندان اؤنجه 1387ده بیرینجی کونسئرتینی تبریزده «بیر دیلدن، بیر تئلدن» باشلیغی ایله سونموشدو.

تورکمان قوروپونون رئپئرتواریندا آزربایجان شئعری و موسیقیسینده اولدوقجا اؤنملی یئرلری اولان نسیمی، شاه ایسماعیل ختایی، نعیمی، نباتی، تیلیم خان، خسته قاسیم، قوربانی و باشقالارینین یانیندا اورتا و گونئی ایران تورکلوگو(قاشقای ائلی)، قوزئی-دوغو-خوراسان(آفشار یورد)، تورکمن چؤلو(تورکمن صحرا)، تورکییه(آنادولو-بالقان) و تورکمان ائلی(عیراق-کرکوک) شئعر و موسیقیسی ده یئر آلیر.

چاغ: 21، 22 و 23 مرداد 1388 - ساعات: 19

یئر: تبریز، پئتروشیمی سالونو

جمعه، مرداد ۱۶، ۱۳۸۸

مذهب تعصصوبو و آلت بیلینج

ایش یئریمه ائولنمه ائیله‌ملری اوچون باش وورانلار بللی بیر ساعاتدان سونرا یئتیشسه‌لر ایشلری او گون دئییل بیر گون سونرایا قالار. دئمه‌ک هر گون گئجیکه‌نلری گولر اوز ایله یولا سالیب صاباح تئز ساعاتدا گلمه‌گه راضی ائتمک روتین ایشیمیزدیر.

جوما آخشامی بیر قیز-اوغلان ایچه‌ری گیردی؛ بویونلارینین بوکوک اولدوغو و اللرینده‌کی ائولنمه دفتری بیتیگیندن ایستکلری بللی ایدی. قویمادیم «سلامزاده به‌ی» سؤزو آغیزلاریندان چیخا. جاوابلاری بللی ایدی: «ریجانیزین نه اولدوغونو بیلیره‌م. ایمکانلاریمیزین آز اولدوغونا گؤره تأسسوفله اونو یئرینه گتیره بیلمه‌یه‌جه‌گم. لوتفن شنبه گونو صاباح تئزدن بورادا اولون.»

آمما سوره‌جی ده‌ییشدیره‌ن اؤنملی بیر شئی اولدو. قیز دئدی:«والی آقا مان تازه مسلمون شودام شانبه بایاد پیشه آغای ماکارم شیرازی باشیم بارای عاقدمون!» بیتیگی اللریندن آلدیم. قیز، لهجه‌سیندن ده بللی اولدوغو کیمی ائرمنی ایدی. ائرمنی دیلینده اه ə یوخدور. بیزیم دیللرده‌کی اه ə سسینی یا ائ e سؤیله‌رلر یا آ a. اؤرنک اولاراق ایصفاهان گزینه «گئز» دئییرلر! سئیید عظیم شیروانی‌نین «گئتمه ترسا بالاسی» شئعری خاطیریما گلدی.بیزیم بو ائرمنی ترسا بالاسی بیر موسلمانلا ائولنمه‌ک اوچون دینینی ده‌ییشمه‌گه مجبور ایدی.

گئتمه ترسا بالاسی، من ده سنه دایه گلیم
یاپیشیم دامنینه، سنله کلیسایه گلیم

یا سن ایسلامی قبول ائیله، منیم دینیمه گل
یا کی تعلیم ائله، من مذهب-ی عیسایه گلیم

شهریارین تورکجه دیوانینین آچیقلامالار بؤلومونده بو شئعر حاققیندا یازیلیب:
...معلوم اولسون کی بو ایکی بئیت مشهور شاعر سئیید عظیم شیروانی‌نین غزلینین باشلانغیجیدیر. غزل دیللر ازبری اولسا دا، سون واختلارا دک چاپ اولونماییبدیر-ح.م.(رحمتلیک پیروفئسور حمید محمدزاده). شهریار بو شئعری چوخ سئویردی و نهایت اونو ایستیقبال ائتدی و اونا «گئتمه ترسا بالاسی ایستیقبالی» عونوانی وئردی...


نه ایسه من هر زامان اؤزومو دین-مذهب باخیمیندان چوخ تعصصوبسوز بیری سایاردیم. آمما بوگون مذهب تعصصوبو و طرفداشلیغینین آلت بیلینجیمین نه قده‌ر درین قاتلارینا ائندیگینی گؤردوم. چونکو او قیزین موسلمان اولاجاغینی ائشیتجه‌گین یوموشادیم و ایشلریمیزین چوخ اولدوغونا باخمایاراق، ایشلرینی یولا سالدیم. عادی باش ووران اولسایدیلار قاپیدان دؤنه‌جکدیلر!

یازیدان سونرا: بونو یولداشلارین بیرینه تعریفله‌دیم دئدی بو گونلر هامی گئدیر مسیحی اولور بو دا ترسه‌سین ائلیر!

پنجشنبه، مرداد ۱۵، ۱۳۸۸

بالدیزیم ICUدا؛ دوعانیزا مؤحتاجام

دوشنبه گونو گنج بالدیزیمی خییاوانین بو تاییندان او تایینا گئچهرکن ماشین ووروب. بو گونه کیمی ده گؤزونو آچماییب؛ ICUدادیر.

بو قوتسال بارات گئجه‌لرینده ساغلیغینا قووشماق اوچون خئییر دوعالارینیزا مؤحتاجام.

دوشنبه، مرداد ۱۲، ۱۳۸۸

«مؤو ایله قویونون دئییشمه‌سی» صحنه‌له‌ندی

دونه‌ن امیری به‌یدن سئویندیریجی خبر گلدی. تئهراندا 14ونجو اولوسلارآراسی گله‌نه‌کسه‌ل تئاتر شؤله‌نی کئچیریلیر و بو شؤله‌نده حکیم ‌تیلیم خان‌ین مشهور «مؤو ایله قویونون دئییشمه‌سی» ده صحنه‌له‌نه‌جک. بوگون بیرلیکده تاماشایا گئتمه‌گه قرار وئردیک؛ باشقا یولداشلار دا گله‌جکمیش.

خبرلرده(1و2و3) ده اوخودوغونوز کیمی دگرلی آراشدیرماجی امیر سهرابی به‌ی بو دئییشمه‌نین یؤنه‌تمه‌نیدیر. سهرابی به‌ی بوندان اؤنجه تیلیم خان‌ین تورکجه شعرلرینی فارسجا چئویری ایله «قوناغا حؤرمت» آدلی کیتابدا یایمیشدیر. چؤگور(ساز) ایفاچیلاری ایسه قوم شهریندن آشیقلار اوستاد حسین علی حسینی و شهریاردان اوستاد نصرت‌الله زرگر ایدیلر. همدانین رزن بؤلگه‌سیندن محمد جعفری به‌ی ده آشیقلاری بالابان ایله ائشلیک ائدیردی.

دئییشمه گئجه ساعات 9دا باشلایاجاق ایدی. امیری به‌ی ایله بیرلیکده یولا دوشوب 9ا بیرآز قالا یئتیشدیک. مهندس کوچه‌لرین بیرینده ماشینی ساخلادی و پارکا(اؤیرنجی پارکی-شهر تئاتری) گئتدیک. کریمی و امیرحسنی به‌یلری تاپدیق.

مرنددن «اوینار تئاتر قوروپو» آدلی تکمچی‌لر گلمیشدی. پارکین آچیق فضاسیندا یئر وئرمیشدیلر بیله‌لرینه. قوپوز(ساز) و بالابان چالیردیلار. چوخ گؤزل ایفالاری وار ایدی و چوخلو آدام یغیشمیشدی.

بیرآزدان قوروپوموزو تاپدیق. دئییشمه آچیق فضادا دئییل چادیرلا اؤرتولو «قهوه‌خانا»دا ایجرا اولاجاقمیش. بو آرادا شؤله‌نین رئیسلری 2 کیشی سهرابی به‌یی چاغیردیلار و فارسجا بیر سیرا بویوروقلار بویوردولار! «آغا سهرابی! هامی بورادا فارسدیر. دوننکی کیمین اولماسین! دونن آشیق ایمران گلدی بورادا هامیسین تورکی دئدی هئچ کیم قولاق آسمادی. گره‌ک فارسی دا دئیه‌سیز!» بو بویوروقلاری ائشیتدیکدن سونرا بیرآز حالیم پوزولدو. قهوه‌خاناداکی ایجرالار بؤیوک بیر LCD واسیطه‌سی ایله آچیق فضادادا یاییلیر. بیزدن اؤنجه‌کی قوروپون ایفاسی بیتمه‌میشدی. دوستلارا دئدیم گئده‌ک غورفه‌لری گزه‌ک.

پارکدا چئشیتلی و بیربیری ایله ایلیشکیسیز غورفه‌لر وار ایدی. ال ایشلری، سوغات، پالتار، زئیتون!... زنجانین ال ایشلری غورفه‌سینه گئتدیک. گؤزه‌ل چاریقلار وار ایدی. سوروشدوم سیزین ال ایشلرینیزدن بیری یونئسکونون اصالت دامغاسینی آلیبدیر. او نه‌دیر؟ دئدی بیلمیرم! دئدیم ملیلیه دئییل؟ مهندس دئدی: «هه دئییرلر ایصفاهانلیلار صاحاب چیخیرلار بو صنعته...» غورفه صاحابی دئدی ملیله باهادیر گتیره بیلمیریک.

LCDده گؤردوک دئییشمه باشلاییر. گیردیک قهوه‌خانایا. اوتوراجاق بوش یئر اولمادیغینا گؤره آیاق اوستده قالدیق. قوروپ صحنه‌یه چیخدی. علی حسینی، زرگر و جعفری به‌یلر میللی شاهسئون گئییملری گئیمشدیلر. گئییملر چوخ یاراشیردی. شئعرلر تورکجه اوخوندو آمما نه یازیق کی شئعرلرین آراسینداکی یئرلری فارسجا دئییردیلر. 10-15 نفرین چیخیب گئتمه‌سی ایله یئر تاپیب اوتوردوم. دالیمدا بیر ایکی نفر آشیقلار اوخودوقدا زمزمه ائدیردی. دئییشمه‌نی حیفظ ایدیلر. فیکر ائلیره‌م ساوه‌لی ایدیلر. جماعت چوخ به‌یه‌نمیشدی و ال چالیردیلار. فیلم گؤتوره‌ن ده چوخ ایدی.

زامانین آز اولدوغونا گؤره دئییشمه‌نین بیر ایکی بندینی اوخونمادی و آخیردا بیلمه‌دیم کیم کیمی باغلادی؟! گئدیب حکیم تیلیم خان دیوانیندان اوخومالییام. نه ایسه قوروپ چوخ آلقیشلاندی . مهندس دئمیشکن بو بیر باشلانغیج ایدی. داهاکی سفرلر داها گوجلو اولار اینشاللاه. آشیقلارلا بیرلیکده دیشارییا چیخیب قوروپلا عکس سالدیق. آشیقلاردان و یولداشلاردان تشککور ائدیب آیریلدیق.