دونه‌ن امیری به‌یدن سئویندیریجی خبر گلدی. تئهراندا 14ونجو اولوسلارآراسی گله‌نه‌کسه‌ل تئاتر شؤله‌نی کئچیریلیر و بو شؤله‌نده حکیم تیلیم خان‌ین مشهور «مؤو ایله قویونون دئییشمه‌سی» ده صحنه‌له‌نه‌جک. بوگون بیرلیکده تاماشایا گئتمه‌گه قرار وئردیک؛ باشقا یولداشلار دا گله‌جکمیش.
خبرلرده(1و2و3) ده اوخودوغونوز کیمی دگرلی آراشدیرماجی امیر سهرابی به‌ی بو دئییشمه‌نین یؤنه‌تمه‌نیدیر. سهرابی به‌ی بوندان اؤنجه تیلیم خان‌ین تورکجه شعرلرینی فارسجا چئویری ایله «قوناغا حؤرمت» آدلی کیتابدا یایمیشدیر. چؤگور(ساز) ایفاچیلاری ایسه قوم شهریندن آشیقلار اوستاد حسین علی حسینی و شهریاردان اوستاد نصرت‌الله زرگر ایدیلر. همدانین رزن بؤلگه‌سیندن محمد جعفری به‌ی ده آشیقلاری بالابان ایله ائشلیک ائدیردی.
دئییشمه گئجه ساعات 9دا باشلایاجاق ایدی. امیری به‌ی ایله بیرلیکده یولا دوشوب 9ا بیرآز قالا یئتیشدیک. مهندس کوچه‌لرین بیرینده ماشینی ساخلادی و پارکا(اؤیرنجی پارکی-شهر تئاتری) گئتدیک. کریمی و امیرحسنی به‌یلری تاپدیق.
مرنددن «اوینار تئاتر قوروپو» آدلی تکمچی‌لر گلمیشدی. پارکین آچیق فضاسیندا یئر وئرمیشدیلر بیله‌لرینه. قوپوز(ساز) و بالابان چالیردیلار. چوخ گؤزل ایفالاری وار ایدی و چوخلو آدام یغیشمیشدی.
بیرآزدان قوروپوموزو تاپدیق. دئییشمه آچیق فضادا دئییل چادیرلا اؤرتولو «قهوه‌خانا»دا ایجرا اولاجاقمیش. بو آرادا شؤله‌نین رئیسلری 2 کیشی سهرابی به‌یی چاغیردیلار و فارسجا بیر سیرا بویوروقلار بویوردولار! «آغا سهرابی! هامی بورادا فارسدیر. دوننکی کیمین اولماسین! دونن آشیق ایمران گلدی بورادا هامیسین تورکی دئدی هئچ کیم قولاق آسمادی. گره‌ک فارسی دا دئیه‌سیز!» بو بویوروقلاری ائشیتدیکدن سونرا بیرآز حالیم پوزولدو. قهوه‌خاناداکی ایجرالار بؤیوک بیر LCD واسیطه‌سی ایله آچیق فضادادا یاییلیر. بیزدن اؤنجه‌کی قوروپون ایفاسی بیتمه‌میشدی. دوستلارا دئدیم گئده‌ک غورفه‌لری گزه‌ک.
پارکدا چئشیتلی و بیربیری ایله ایلیشکیسیز غورفه‌لر وار ایدی. ال ایشلری، سوغات، پالتار، زئیتون!... زنجانین ال ایشلری غورفه‌سینه گئتدیک. گؤزه‌ل چاریقلار وار ایدی. سوروشدوم سیزین ال ایشلرینیزدن بیری یونئسکونون اصالت دامغاسینی آلیبدیر. او نه‌دیر؟ دئدی بیلمیرم! دئدیم ملیلیه دئییل؟ مهندس دئدی: «هه دئییرلر ایصفاهانلیلار صاحاب چیخیرلار بو صنعته...» غورفه صاحابی دئدی ملیله باهادیر گتیره بیلمیریک.
LCDده گؤردوک دئییشمه باشلاییر. گیردیک قهوه‌خانایا. اوتوراجاق بوش یئر اولمادیغینا گؤره آیاق اوستده قالدیق. قوروپ صحنه‌یه چیخدی. علی حسینی، زرگر و جعفری به‌یلر میللی شاهسئون گئییملری گئیمشدیلر. گئییملر چوخ یاراشیردی. شئعرلر تورکجه اوخوندو آمما نه یازیق کی شئعرلرین آراسینداکی یئرلری فارسجا دئییردیلر. 10-15 نفرین چیخیب گئتمه‌سی ایله یئر تاپیب اوتوردوم. دالیمدا بیر ایکی نفر آشیقلار اوخودوقدا زمزمه ائدیردی. دئییشمه‌نی حیفظ ایدیلر. فیکر ائلیره‌م ساوه‌لی ایدیلر. جماعت چوخ به‌یه‌نمیشدی و ال چالیردیلار. فیلم گؤتوره‌ن ده چوخ ایدی.
زامانین آز اولدوغونا گؤره دئییشمه‌نین بیر ایکی بندینی اوخونمادی و آخیردا بیلمه‌دیم کیم کیمی باغلادی؟! گئدیب حکیم تیلیم خان دیوانیندان اوخومالییام. نه ایسه قوروپ چوخ آلقیشلاندی . مهندس دئمیشکن بو بیر باشلانغیج ایدی. داهاکی سفرلر داها گوجلو اولار اینشاللاه. آشیقلارلا بیرلیکده دیشارییا چیخیب قوروپلا عکس سالدیق. آشیقلاردان و یولداشلاردان تشککور ائدیب آیریلدیق.
هیچ نظری موجود نیست:
ارسال یک نظر