دونه‌ن بؤلگه‌میزین گله‌جه‌گینه بؤیوک تأثیر بوراخاجاق، تورکییه-ائرمه‌نیستان آراسیندا تاریخی بیر پیروتوکول ایمضالاندی. بو، بیرینجی درجه‌ده تورکییه، آزه‌ربایجان و تورک دونیاسینین باشاریسی ایدی منجه. بو پیروتوکول ایله تورکییه، خاریجی سییاستینده اساس آلدیغی «قونشو اؤلکه‌لرله صیفیر مسأله» هدفینه بیر آددیم داها یاخینلاشدی.
ایسوئچره(سوئیس)
پیروتوکولون ایمضالاناجاغی یئر ایسوئچره‌نین زوریخ شهری بیلی‌یوردو ایدی. ایسوئچره دونیادا طرفسیز بیر اؤلکه کیمی تانینسا دا بو تورک-ائرمه‌نی مسأله‌سینده ایندییه کیمی هئچ ده طرفسیز اولمامیشدیر. ایسوئچره‌ده قوندارما ائرمه‌نی سویقیریمینی ردد ائتمه‌ک ایچه‌رییه آلینماق دئمه‌کدیر.
تورکییه ساعاتی ایله 18ده ایمضالاناجاق پیروتوکول، ساعات 21ده ایمضالاندی. حتتا ایمضانین آتیلمایاجاغی و یا داها آشاغی سوییه‌ده، یعنی دیش ایشلر باخانلاری طرفیندن دئییل، ائلچیلر طرفیندن ایمضالاناجاغی خبرلری ده یاییلدی بو 3 ساعاتدا. بو 3 ساعاتدا نه‌لرین باش وئردیگی چوخ دا بللی دئییل؛ آمما بیلگیلره گؤره، گرگینلیک ایکی اؤلکه‌نین ایمضادان سونراکی چیخیش متنلریندن قایناقلانمیش. دئییرلر تورکییه طرفینین ائرمه‌نی متنینده‌کی «بو ایمضانین قاراباغ ایله ایلیشکیسی یوخدور» و ائرمه‌نی طرفینین تورکییه متنینده‌کی «بو ایمضا قافقاز(اوخویون قاراباغ) بؤلگه‌سینه باریش گتیره‌جه‌ک» بؤلوملرینه ائعتیراضی وار ایمیش.
آمئریکانین رولو
بو تاریخی ایمضادا اوباما باشدا اولماق اوزره آمئریکانین رولو دا اینکار ائدیلمز. هیلاری خانیمین گرگینلیگین اورتادان قالخماسیندا بؤیوک امه‌گی گئچیب. ایکی اؤلکه‌نین ایمضادان سونراکی چیخیش متنلرینه ائعتریاضیندان قایناقلانان گرگینلیگی ده، امیضادان سونرا «نه داووداوغلو چیخیش ائتسین نه نالباندییان» فورمولو ایله اؤرت-باسدیر ائله‌دیلر. گینه ساغ اولسون هیلاری خانیم.
روسیه
هامییا رغماً، روسیه دیش ایشلری باخانی لاوروو داش کلم کیمی دورموشدو و دئیه‌سه‌ن ائله ده راضی دئییلدی بو ایمضادان. هر نه اولسا بو ایمضا ایله ایپین اوجو رسماً روسیه‌نین الیندن چیخیب، آمئریکا و تورکییه‌نین الینه گئچدی.
نالباندیان(نعلبندیان)
نالباندییانی دا زور ایله اورایا اوتورتمالاری بللی ایدی؛ داها دوغروسو آمئریکا باسقیسینی بو ایمضادا گؤرمه‌مه‌ک مومکون دئییلدی منجه. یا دا نالباندییان اؤزونو ریضایتسیزلیگه وورموشدو. عکسلرده‌کی داووداوغلونون گولوشو و نالباندییانین روحسوز باخیشلاری گؤرونور.
ائرمه‌نی دییاسپوراسی(ائرمنی موهاجیر جامیعه‌سی) و داشناکتسوتیون
ائرمه‌نی دییاسپوراسی و داشناکلار باشیندان بری بو مسأله‌نی قوندارما بؤیوک ائرمه‌نیستان خولیاسینا خیانت کیمی ده‌یه‌رلندیریردیلر. اصلینده بو ایمضا ایله، ائرمه‌نیستان-تورکییه اورتاق سینیری و قارس آندلاشماسی بیر داها رسماً تانینمیش اولدو.
دییاسپورا: بو خایین ائرمه‌نیستانا پول گؤندرمک حرام!
بو یازینی یازارکن دییاسپورادان سون خبر ده گلدی: «دییاسپورا ائرمه‌نیستانا گؤندردیگی مالی یاردیملاری بیر داها گؤزدن گئچیره‌جه‌کمیش!» دئمه‌ک تورکییه، دییاسپورا ایله ائرمه‌نیستان آراسینا فاصیله سالماغی دا باشاردی. بو گله‌جه‌کده آزه‌ربایجانین دا خئیرینه اولاجاقدیر.
آیریجا باخین: 1 2 3 4
هیچ نظری موجود نیست:
ارسال یک نظر