دونن ائوه ور-وساییل آلماق اوچون ائشیم ایله بیرلیکده چیخمیشدیق بازارا. گؤبه‌له‌ک(قارچ) ساتان توکانین یاخینلیغیندا بیر کبابچی وار ایدی، تابلویا یازمیشدی «کباب داریم تا کباب»! دئدیم گؤره‌سه‌ن بونون تورکجه‌سی نه اولار؟
دونن گئجه‌د‌ن فیکیرله‌شیردیم خاطیرلایابیلمیردیم. بوگون سحر بیردن دئدیم:«کاباپ وار، کاباپ وار!» ائشیم دئییر «نه‌دیر گؤیلون کاباب'یستیر؟» دئییره‌م یوخ بابا دوننکی توکان تابلوسونون تورکجه‌سین تاپمیشام! بیزیم ماراغادا بیر شئیین ائشسیز، خاصا و نفیس اولدوغونو خاطیرلاتماق اوچون بئله ترکیبلر ایشله‌دیرلر. اؤرنه‌ک: «بال وار، بال وار!»، «قایماق وار قایماق وار!»
کباب سؤزجوگونون کؤکه‌نی
بیلدیگیم قدری ایله بو «کباب» سؤزجوگو عربجه‌دن گیریب دیلیمیزه. سئوان نیشانیان سؤزلرین سوی‌آغاجی(چاغداش تورکجه‌نین ائتیمولوژیک سؤزلوگو) اثرینده «kebap» سؤزجوگونون عربجه اولدوغونو یازیب، عربجه‌نین اقربا دیللری اولان آرامی و اکد دیللرینده‌کی کؤکلرینی ده وئرمیش:
kebap
~ Ar kabāb [#kbb msd.] kızartma, kızartılmış et ~ Aram kəbabā a.a. (= Akad kabābu kızartmak, yakmak )
بیزیم مراغادا «کاباپ» دئییرلر. تبریزلیلر ایسه «کباب» دئییر. «کاباپ» دئییله‌نده دیلیمیزه داها اویغوندور آمما «یوموشاق ک» ایله «قالین آ»نین یان-یانا گلمه‌سی «گوبوت/کوبود kobud/gobut» سؤزجوگونون اؤزو کیمی بیر آز گوبود'ولور.
سونداکی «ب/پ»یه گلینجه «قوزئیین آزه‌ربایجانجاسیندا» قایدا سونداکی «ب/پ»نین «ب» یازیلماسیدیر؛ آمما من شخصا «پ»نی به‌یه‌نیره‌م. یانی اولوپ، گلیپ، کیتاپ و بنزری شکیللری ترجیح ائدیره‌م.
یازیدان سونرا:
دئیه‌ن یوخدو بو اوروجلوغ'آییندا نامازدان-دووادان(دوعادان) دانیشماق یئرینه نییه کاباپدان، بال-قایماقدان دانیشیب میلله‌تی اومدوروسان آخی؟!
سلام. گينه ده منيم داها اؤنجه ماراقلانديغيم بير قونويا توخوندونوز. منده سيزين كيمي بو كلمه نين توركجه ميزده كاباپ اولاراق تثبيت ائديلمه سينده ن يانايام. كاباب كلمه سينين كؤكه نيني آراشديراندا، ايلكين اونون سامي ديلله رينديه قيزارديلميش ات آنلاميندا اولدوغونو، داها سونرا توركله ر طره فينده ن بوگونكو شيشه چكيله ن ات آنلامي قازانديغيني اؤيره نديم. بير ده اسكي توركجه ده كاباب`ين قارشيليغي سؤكلونج ايميش. (سؤكلونمه ك=كاباب اولماق، سؤكلوتمه ك= كاباب ائتمه ك).
پاسخحذف